මුලතිව් කිමිදුම් පුහුණු පාසලේ සංග්‍රාමික කිමිදුම්කරුවන් 40 දෙනෙක් විසිර යති

by Hashini De Mel 17-07-2018 | 5:17 PM

COLOMBO (News 1st) - මුලතිව්, නයාරු ප්‍රදේශයේ ස්ථාපනය කර ඇති සංග්‍රාමික කිමිදුම් පුහුණු පාසලේ පාඨමාලා අංක - 5 සාර්ථකව හැදෑරු නිලධාරීන් 2 ක් සහ සෙසුනිලයින් 38 දෙනෙකුගේ විසිර යෑමේ උත්සවයක් පැවැත් විණි.

ඒ, පසුගිය ජූලි 15 වන දින මුලතිව්, නයාරු මුහුදු වෙරළේදී ය. මෙම මූලික කිමිදුම් පාඨමාලාව හැදැරීමෙන් දක්‍ෂ කිමිදුම්කරුවෙකුවීමට අවශ්‍ය කිමිදුම් ක්‍රමෝපායන්, ආරක්‍ෂිත ඉරියව් ආදිය අධ්‍යයනය කිරීමට අවස්ථාව උදාවිය. යුද හමුදාධිපති ලුතිනන් ජෙනරාල් මහේෂ් සේනානායක මහතාගේ ප්‍රධානත්වයෙන් පැවති උත්සවයේදී මෙම පාඨමාලාවේ සෑම අතින්ම අතිශූර සෙබලාට හිමි සම්මානය පිරිණැමුණු අතර මෙම අවස්ථාවට ජ්‍යේෂ්ඨ නිලධාරීන්, අනෙකුත් නිලධාරීන් සහ සෙසුනිලයින් රැසක් එක් ව සිටියහ. සෑම අතින්ම අතිශූර සෙබලාට හිමි සම්මානය කමාන්ඩෝ රෙජිමේන්තුවේ කපිතාන් ජේ.ඒ.එම්.සී. අමරසිංහ ටත් හොඳම පිහිනුම්කරු සහ කිමිඳුම්කරු ලෙස 2 වන විශේෂ බලකායේ ලාන්ස් කෝප්‍රල් කේ.ඒ.අයි. නදීෂ්ට හිමි විය. පාඨමාලාවේ හොඳම ශාරීරික යෝග්‍යතාවය හිමි සිසුවා ලෙස 4 වන විශේෂ බලකායේ කෝප්‍රල් පී. ඩි. ඩබ්ලිව්. කරුණාරත්න වෙත යුද හමුදාපති අතින් සම්මානය පිරිනැමිණි.