දුම්රිය වෘත්තීය සමිති දහවල් 12 සිට වැඩ වර්ජනයක

COLOMBO (News 1st) - දුම්රිය වෘත්තීය සමිති අද දහවල් 12 සිට වැඩ වර්ජනයක් ආරම්භ කර තිබේ. දුම්රිය නියාමකවරුන්ගේ සංගමයේ සභාපති ජානක ප්‍රනාන්දු මහතා සඳහන් කළේ, තම ඉල්ලීම් සම්බන්ධයෙන් විසඳුමක් නොලැබීම හේතුවෙන් වැඩ වර්ජනය ආරම්භ කළ බව ය. ඉල්ලීම් කිහිපයක් මුල් කර ගනිමින් ඊයේ මධ්‍යම රාත්‍රියේ සිට වැඩ වර්ජනයකට අවතීර්ණ වීමට දුම්රිය සේවකයින් තීරණය කර තිබිණි. බලධාරීන් සමග කළ සාකච්ඡාවලින් අනතුරුව දුම්රිය වෘත්තීය සමිති ආරම්භ කිරීමට නියමිතව තිබූ වැඩ වර්ජනය තාවකාලිකව අත්හිටුවීමට තීරණය කළේ ය. දුම්රිය වෘත්තීය සංගම් කළ ඉල්ලීම් සම්බන්ධයෙන් විසඳුම් ඇතුළත් අමාත්‍ය අනු කමිටු යෝජනා අද කැබිනට් මණ්ඩලයට යොමු කරන බව ද ප්‍රවාහන අමාත්‍යංශය සඳහන් කළේ ය. ජානක ප්‍රනාන්දු මහතා සඳහන් කළේ, මේ වන තෙක් ඒ සම්බන්ධයෙන් කිසිදු ප්‍රතිචාරයක් නොලැබීම හේතුවෙන් වැඩ වර්ජනය ආරම්භ කිරීමට තීරණය කළ බව ය.